مصر أنتِ حتة مني

هاكتبلكوا أغنية سمعتها وأثرت فيا قوي .. بصراحة كان نفسي انقلكوا الكليب بتاعها من علي اليوتوب بس حاليا مش عارفة أعمل ده إزاي ..علي كل حال ده مايمنعش ان عندي رغبة أقوي في كتابتها لحين دمج الكليب في وقت لاحق .. بالمناسبة الأغنية كان مكتوب جمبها تعليق ظريف قوي .. عبارة عن تحذير لكل مصري خارج مصر يمنعه عن سماع هذه الأغنية وبما اننا خارج مصر فبسرعة فتحناها!!



واحنا فايتين ع الحدود
مستمرين في الصعود

اختفي النيل الجميل من تحتنا
والمدن .. والريف..وأول عمرنا

وابتدى شيء ينجرح جوة الوجود
وابتدينا أسئلة ملهاش ردود

ملنا ع الشباك نخبي دمعة فرت مننا


باصة م الشباك علي البحر البعيد
واحنا رايحين بالأمال عالم جديد
كنت فاكرة يامصر أني تعبت منك
اكتشفت أني محال استغنى عنك
حتى دوشة صوت جراني
والزحام وحشوني تاني
بسمة حلوة لطفلة لسة صغيرة
لما كنت أديها حتة سكرة
قبل ما نسيبك وحشتينا يامصر يا أمنا


وابتدى شيء ينجرح جوة الوجود
وابتدينا أسئلة ملهاش ردود

ملنا ع الشباك نخبي دمعة فرت مننا


كنت باتذكر وأنا ف غاية الأسى
لعبنا الكورة ف حوش المدرسة
الشقاوة واحنا لسة صغيرين
والبراءة والصحاب الطيبين
لما سألتني اللي جنبي: انت مصري؟
دق قلبي
اسم زي السحر رفرف ع المكان
زي نسمة مهفهفة بصوت الأدان
أيوة مصريين لآخر كل نقطة في دمّنا
أيوة مصريين لآخر كل نقطة ف دمنا


وابتدى شيء ينجرح جوة الوجود
وابتدينا أسئلة ملهاش ردود

ملنا ع الشباك نخبي دمعة فرت مننا


الوجوه من تلج وعيون من إزاز
شوقي زاد للعشرة والناس العزاز
وابتديت اكتب وانا فوق السحاب
ابتديت ياحبيبي في أول جواب
مصر انتي حتة مني مش مجرد اسم وطني
قالوا فاضل نص ساعة ع الوصول
قلت إيه معنى الساعات والا الفصول
إلا في الأرض اللي فيها ذكرياتنا وحبنا
إلا ف الأرض اللي فيها ذكرياتنا وحبنا


وابتدى شيء ينجرح جوة الوجود
وابتدينا أسئلة ملهاش ردود

ملنا ع الشباك نخبي دمعة فرت مننا

=======================================================

طبعا مش محتاجة اقولكوا البكا اثناء سماع الاغنية وبعدها كان شكله إيه..

الله يسامحه بقي كاتب الأغنية وملحنها واللي غنوها واللي نشرها كمان

نبضات

تدعو الحاجة أحيانا إلى تواجدنا خلف أعتاب الكتابة دون قصد أو ربما بقصد مبهم لا ندركه حينها .. الليلة مثلا لدي تلك الرغبة المبهمة في الكتابة ..
مصر ..أفتقدها كثيرا هذه الأيام في كل يوم أتمني لو أعود إليها ..الغريب أنه بعد عودتي بأيام أجد ان ذهابي إلي هنا مرة أخري هو الشيء الحتمي والمنتظر!!!!!!!

صديقتي .. علي الرغم من متابعتبي ليها ع النت ومحادثاتي معاها ع الماسنجر (أحيانا) .. إلا أنني لا أجدها إلا في قلبي ودنيايا الخاصة جدا.

أحلامي .. أعتقد انني لم أعد أحلم من فترة طويلة لقد فقدت الحلم .. كنت أشتكي وأنا صغيرة من كثرة أحلامي كنت أعتقد أن ليلي كله أقضيه في الحلم وكنت أحلم بتلك الليلة التي سأنام فيها نوما عميقا دون أحلام ... فاتضح أنه نوما عقيما دون أحلام!!

زوجي .. ألعب معه لعبة جديدة هذه الأيام عن طريق النت ..أتفقنا أن نكون أصدقاء أو عاشقين بعناوين بريد مختلفة لعشاق مجهولين .. وأقول له في سري ها أنا ذي أصبحت اثنتين في حياتك زوجة وصديقة عاشفة وتبقى أثنتين (ليصبحوا أربعة حسب الشرع) وسأصنعهم لك كذلك !!!!!!!!


صغيري وعمري كله .. كيف أحكي عنه .. أخاف من الحسد

النوم .. يكبس عليا الآن والصغير لا ينام

حاول تفتكرني ... أغنية عبد الحليم التي لا أملك نفسي أبدا عند .. أيوة هانبدأ نخرف أهوه لأ أقوم أنام أحسن تصبحوا علي خير ...

فضفضة

قبل ما اتجوز كنت ديما باكره الستات المتجوزين ومابعرفش أصاحبهم أبدا واستغرب طب ماهم كانوا بنات في يوم من الأيام إيه اللي اتغير ؟؟
يمكن اهتمامتهم بقت غير اهتماماتي .. يمكن عشان اغلب كلامهم عن الطبيخ والعيال وأبوهم .. يمكن

طيب أديني اتجوزت من أكتر من سنة ونص .. ياترى ياهل ترى أنا كمان اتغيرت وبقيت الصورة اللي كرهتها طول عمري

انا مش هانكر، بصراحة انا فعلا اتغيرت.. مش اهتماماتي اللي اتغيرت بس، كان هيبقى أهون كتير ..في حاجات جوايا اتغيرت ،حاجات مش لاقياها ..
مفتقدة جدا أني أكون صادقة مع نفسي واللي حوليا ..مفتقدة جدا للصفاء الروحي والفكري ..مفتقدة الكتاب والكتابة وسهري معاهم طول اليل
حاسة أني في حالة من التبلد الأنساني .. والحسي.

غروب

عندما أريد أن أغلق صفحات ما أحبها بشدة يتملكني ألم وحزن شديدين إذ سوف أفقد ذلك الاحساس الرائع الذي عايشته مع تلك الصفحات .. وهي في النهاية مجرد صفحات من ورق .. ماذا لو كانت صفحات من حياتي من ذاكرتي أحبها بشدة لكنها ليست لي تماما ولست لها تماما .. وعليَّ اغلاقها بشدة وألم ..

افتكرت دلوقتي حوار في مسلسل كوري بين البطل والبطلة.. كان بيسألها : لو انا عقدت العزم علي اني مش هارجع اشوف شخص ما وأصريت علي كدة تفتكري لو اشتقتله هارجع ..
أيا كان ما قالت البطلة وردت به.. لأني في الواقع مافتكرش أني في براءة البطلة دي وسماحتها .. المهم ان الصفحات لازم تتقفل تماما .. حتي مع اشتياقي لحكايتها .

بداية

بسم الله الرحمن الرحيم


لازم في البداية أعترف اني كسولة جدا .. وان انشاء المدونة دي محاولة لتنفيض الكسل اللي ملازمني من فترة ويا عالم بقي اذا كنت هانجح في ده ولا لأ .. ويا عالم كمان إذا كنت هاقدر اكون نفسي في المدونات دي والا هاكون حد تاني ..

هانسيب ده للأيام وفي يوم هاعترف أيهما كنت !!

ع دروب الهوى .. ده العنوان اللي اخترته بشكل مبدأي للمدونة هو أغنية لفيروز .. وانا متصورة أني هاغيره قريب خصوصا اني مش مختراه لهدف معين لكن هو اللي علي بالي وقتها.

وسراب كمان "التوقيع" مافكرتش كتير وأنا باختاره بس ماظنش أني هاغيره !!


زي ماقولت .. الهدف الأول من كتابة المدونة دي اني انضف أكوام الكسل المتراكمة على نفسي.. ويمكن تظهر أهداف بعد كدة بس بعد ما الهدف الاول يتحقق بالتأكيد.

مش عارفة اذا كان في حد هايقرى اللي باكتبه ده والا لأ؟!.. بس أكيد لو في اهتمامي هايزيد .. ولو مفيش هرتلاتي هي اللي هاتزيد

أراكم قريبا